Hindi natapos na Barangay Hall sa Boac, magkano kaya ang halaga?

Isang mensahe nanaman po ang aming natanggap patungkol sa isang pinagawang barangay hall sa Cawit, Boac na hanggang sa ngayon ay hindi pa natatapos.

(Muli, pinilit naming hindi ipakita ang kayang pagkaka-kilalanlan para na rin sa kanyang proteksyon.)

Agad kameng nagtungo sa nasabing barangay hall upang makumpirma ang sumbong.

Sa mga litratong inyong makikita, patunay lamang na hanggang sa ngayon ay hindi parin ito natatapos.

Makikita sa larawan na ang unang palapag palamang ng gusali ang may palitada.

Ang isang bahagi ng ikalawang palapag ay hanggang sa ngayon wala paring bubongan.

Wala pa ring bintana at pintuan.

Sa estado ng gusaling ito, tiyak hindi pa talaga ito pwedeng gamitin.

Kung atin itong ihahalintulad sa isang pinapagawang bahay. 

Ayon sa aking nakuhang datos mula sa Gawad Kalinga, ang isang Core Shelter na tulad nito ay nagkakahalaga lamang ng P100,000.00 hanggang P110,000.00 kada unit.

Mayroon na rin itong kasamang palikuran, maliit na lababo, bintana at napinturahan na rin ang labas na bahagi nito.

Kaya't muli naming inalam kung magkano ang pinondo ng ating Gobyerno para proyektong ito.

Ayon sa tala ng Department of Budget and Management,

na dito makikita: http://pdaf.dbm.gov.ph/index.php?r=Site/Project_breakdown2/legislatorId/403/districtID/328/projectId/215281/fy/2012

Noong May 04, 2012, (halos isang taon na ang lumipas) naglabas ang ahensya ng halagang P1,000,000.00 

(Isang Milyong Piso) para sa proyektong ito at ang DPWH - Marinduque District Engineering Office ang naging Implementing Agency.

Kung ihahalintulad natin ito sa proyekto ng Gawad Kalinga, makakagawa na sila ng 10 hanggang 9 na Core Shelter sa pondong ito.

"Given the benefit of the doubt" na ang pinagawang barangay hall ay 2 palapag at sabihin narin nating malawak ang espasyo nito kesa sa isang Core Shelter.

Masasabi natin kahit hindi tayo isang inhinyero o arkitekto, sobra sobra parin ang Isang Milyong Pondo para matapos ang gusaling ito.

Amin ding tiningnan ang website ng DWPH upang alamin kung anu na ang "status" ng gusaling ito.

na dito makikita: 

http://www.dpwh.gov.ph/infrastructure/pdaf/index.htm

Inisa-isa na namin ngunit bigo parin kameng makita ang nasabing proyektong ito.

Sinikap narin naming hingiin ang panig ng kampo ng dating Congressman Lord Allan Velasco upang malaman ang iba pang mga detalye ng nasabing proyektong ito.

Sa kadahilanan na hindi kame sinagot noon ng dating Kongresista, sinubukan naming ipinadaan ang reklamong ito sa kanyang butihing may bahay na si Mrs. Wen Velasco.

Ngunit sa kasamaang palad ay wala rin kameng nakuhang tugon mula sa kanya. Pero makikita sa larawan na nakita o nabasa niya ang aming mensahe.

Kagustuhan lamang po naming maiparating sa ating mga kababayan kung saan napupunta ang buwis na kanilang binabayad.

Wala po kameng ninais na siraan sa paghahabol naming ito. Gusto lamang po naming ipahatid sa ating mga kababayan kung anu ang nararapat na Serbisyo Publiko para sa kanila.

Kaya dapat tayo ay laging handang magmasid, maki-alam, bantayan! Kung saan napupunta ang pondo ng ating bayan!

Kalahating Bubong na Covered Court sa Gasan.

Isang mensahe sa ating facebook account ang humihingi ng sagot sa kanyang katanungan ukol sa isang proyekto na ipinagawa sa kanilang paaralan.

(minabuti po nating hindi na ipakita ang pagkakakilanlan ng ating complainant para rin sa kanyang kaligtasan.)

Ang nasabing covered court ay ipinagawa ng dating Congressman Lord Allan Velasco.

Agad naming pinuntahan ang sinasabing Covered Court at aming nakumpira ang sumbong.

Ayon sa mga gurong ating naka-usap, Enero palang ng nakaraang taon nagsimula ang pag sasa-ayos ng covered court na ito at hanggang sa ngayon ay hindi pa ito natatapos dahil sa kakulangan sa pondo.

Sa mga litratong ito, makikitang mayroon pang ginaganap na pagpupulong ang mga guro at magulang ng Bognuyan National High School at nag sisiksikan lamang sila sa isang gilid upang maiwasan ang matinding init.

Hindi rin nila nagagamit ang stage dahil tanging apat na beam lamang ang nakatayo dito at wala parin itong bubongan.

Inalam din namin kung magkano at kailan narelease ang pondo para sa proyektong ito.

Ayon sa tala ng Department of Budget and Management (DBM), ang sangay na namamalaha at nagrerelease ng pondo para sa Priority Assistance Development Fund (PDAF) o mas kilala sa tawag na "Pork Barrel" ng mga kongresista.

Makikita sa kanilang website, 

http://pdaf.dbm.gov.ph/index.php?r=Site/Project_breakdown2/legislatorId/403/districtID/328/projectId/201125/fy/2011

Na noon pang November 24, 2011 narelease ang tumatagingting na Apat na Milyong Piso (P4,000,000.00) ng DBM para sa nasabing proyektong ito. Ngunit makikita naman sa mga larawan na hanggang sa ngayon ay hindi parin ito natatapos.

Amin ding tiningnan ang website ng Department of Public Works and Highways (DPWH) na naging Implementing Agency ng nasabing proyekto upang malaman kung sino ang naging contractor at status nito.

http://www.dpwh.gov.ph/infrastructure/pdaf/index.htm

Ilang beses naming inisa-isa ang listahan ng mga proyekto, ngunit nakapagtakang wala sa kanilang tala ang nasabing proyektong ito.

Pinilit namin hingiin ang panig ng dating Congressman Allan Jay Velasco sa kanyang facebook account hingil sa nasabing proyekto, ngunit hanggang sa ngayon ay wala parin siyang sagot sa amin.

Umaasa kami na sa mga susunod na araw ay magkaron na ng kalutasan ang problema sa proyektong ito dahil sayang ang pera ng taong bayan na pinondo para dito.